你出豉油我出鷄！原來兩千元消費券「咁勁」

【看中國2023年7月22日訊】（看中國記者蘇菲綜合報導）最近幾日「港官笑料新聞」多得滯，未有時間講下港府派發第二期2,000元消費券的「勁暖心故事」，今日補番，包保你聽完精神大振，話唔埋亦蠢蠢欲動，諗下是否要用港府所派的2,000元消費券，來換架「波子」，或者太古城一個單位。

話説16號，是港府第二期2,000元消費券派發首日。有商店同商場爲了配合消費券推出優惠，全力吸生意。

據説，《東網》記者當日下午去到觀塘一商場瞭解市民的意見及消費情況，嘩，發現現場人頭湧湧，好熱鬧咁款。

其中有位翁生，更加豪使11.5萬港元，買了只戒指給太太。翁生話，其實金額大小不重要，最重要的是太太高興；就算沒有消費券也會照樣購買，不過，有消費券的話，「會買得重手啲」。

翁太當然是開心到「見牙唔見眼」同記者講，希望港府明年也可派發消費券……

看來港府的2000蚊消費券果然是「威力無窮」！2000蚊就可以引到11萬的消費。不過，咁暖心的故事，有網民似乎「唔多Buy喔」。

有網民留言表示：「臨時演員都係演員，有時啲廣告，吹都要用下腦架。」

有網民就表示，「我成日話啲消費券連我手袋條帶都唔夠買，今日竟然俾我見到攞2000蚊消費券幫補隻11萬戒指，真係大開眼界。」

有網民就好奇：「唔知有冇人拎2千去買層樓的呢？」

有網民就跟帖開玩笑表示：「樓我就未敢諗住，不過我打算今次拎2000去買架林寶堅尼。如果下次政府派消費券增加到5000蚊，我就拎去太古城買個單位。」

咦！特首先生，政府派幾千蚊消費券，市民就會豪使幾十萬甚至幾百萬帶動香港經濟。你出豉油人出鷄，諗得過喔，出年一於派多啲消費券比香港市民啦，我包保香港的經濟即刻好似坐了火箭一樣，嗖嗖聲上升。