Quantcast

content

港愛國傳媒冷對溫吳會(圖)

2011-04-28 12:21 作者:李八方 桌面版 简体 0
    小字


「上面」除咗要愛國報章冷處理溫吳會,連溫夫人張蓓莉張相都唔畀登。設計圖片

香港左派元老吳康民本月23日獲總理溫家寶單獨接見,前日吳康民透過佢擔任主席嘅培僑教育機構發出新聞稿及相片,消息出街後政界議論紛紛,全方位試圖解讀呢次會面有乜隱密訊息、微言大義。喺海嘯式口水評論浪潮當中,八方收到可靠消息,「上面」要將呢次會面急降溫,漏夜指示香港愛國傳媒必須「冷處理」呢單新聞,令呢次會面內情更耐人尋味。

左報抽一半稿件

吳康民喺本地左派陣營地位崇高,《文匯報》、《大公報》及《香港商報》等愛國報章,大做「溫吳會」新聞理所當然,不過三份報紙噚日報導卻簡而清,與電子傳媒及其他報紙比較,篇幅更顯得不夠顯著。知情人士同八方講,前晚「上面」突然下達指示,話不要大做,因此幾份愛國報章即時刪減篇幅,據講抽咗最少一半份量稿件。

除咗減少篇幅,報導內容亦刻意平淡,《香港商報》定性為「閒話家國事」;《文匯報》引述吳康民稱,溫家寶「並非要透過他向香港市民表達任何訊息」;《大公報》指「溫吳會」系「朋友敍舊」,更欲蓋彌彰,指溫家寶去年都見過國學大師饒宗頤。

為免外界揣測「溫吳會」內幕一發不可收拾,八方聽聞好多左派人士都收到提示,唔好再「炒」呢件事,要淡然處理,因此佢哋噚日異口同聲為會面降溫,人人大事化小,小事化無,幾乎講到好似只系兩個閒人偶然見面咁平常,十分古怪。

吳康民都要轉軚

其實吳康民都「聞」到味,前日下午佢向記者表示,溫總認為香港有社會矛盾未解決,又話內地有人唔肯講真話,只講大話、套話,但晚上再受訪時,卻唔再提呢啲嘢,只系話同溫家寶閒話家常。點解吳康民都要轉軚呢?唔通上面有人認為溫總講話敏感,因此禁止出街?

亦有一個無從證實說法,前日系《4.26社論》發布22週年,眾所周知溫家寶當年系趙紫陽秘書,佢指內地無人講真話,其實系曲線批評《4.26社論》。呢次「溫吳會」真相恐怕難見天日,至於下令冷處理會面系權鬥現象,抑或只系溫影帝自導自演,好戲在後頭!


上週六陪溫家寶見吳康民夫婦嘅張蓓莉(左一),本地左報卻好似當佢透明,冇登佢張相。

溫家寶夫人不見了!

在荒謬的國度,藝術家可以人間蒸發;領導人妻子,也可以忽然消失。「溫吳會」其中一個焦點,系溫家寶破天荒帶埋妻子張蓓莉接見吳康民夫婦,而四人喺中南海嘅合照,更加系幾十年來溫家寶夫婦唯一曝光合照,令到呢次「溫吳會」更加矚目。

不過本地愛國報章「被決定」低調報導會面後,竟然連溫、吳兩對夫婦嘅四人合照都「河蟹」咗,八方噚日翻遍又翻遍《文》、《大》、《商》都搵唔到呢張合照,總理夫人忽然不見了!三份報章只系刊登溫家寶攙扶吳康民落樓梯嘅相片,同埋兩人合照,張蓓莉樣貌始終不能「出口轉內銷」。

總理夫人不能曝光,據講系因為佢系中國珠寶界「大姐大」,平日穿金戴銀,與溫家寶「平民總理」形象唔夾,影帝為咗「連戲」,惟有當老婆透明。幾份本地愛國報章都輕輕帶過張蓓莉露面消息,吳康民太太受訪時話,離開時獲張蓓莉攙扶落樓梯,又話張蓓莉自言年紀細佢 10年,因此叫吳康民太太做「大姊」,總理夫人咁客氣,吳太話系「一生榮幸」。

一人一句談溫吳會

前律政司司長梁愛詩:
溫總見吳康民好平常,領導人念舊啫。

工聯會會長鄭耀棠:
佢哋 09年已經約見,大家有時間,會面好平常。

工聯會理事長黃國健:
唔多唔少系安撫,因為回歸後老愛國不如新愛國,新愛國不如忽然愛國。

来源:香港蘋果日報 --版權所有,任何形式轉載需看中國授權許可。 嚴禁建立鏡像網站。
本文短網址:


【誠徵榮譽會員】溪流能夠匯成大海,小善可以成就大愛。我們向全球華人誠意徵集萬名榮譽會員:每位榮譽會員每年只需支付一份訂閱費用,成為《看中國》網站的榮譽會員,就可以助力我們突破審查與封鎖,向至少10000位中國大陸同胞奉上獨立真實的關鍵資訊, 在危難時刻向他們發出預警,救他們於大瘟疫與其它社會危難之中。

分享到:
善举如烛《看中国》与您相约(图)

看完那這篇文章覺得

評論

暢所欲言,各抒己見,理性交流,拒絕謾罵。

留言分頁:
分頁:


作者李八方相關文章

x
我們和我們的合作夥伴在我們的網站上使用Cookie等技術來個性化內容和廣告並分析我們的流量。點擊下方同意在網路上使用此技術。您要使用我們網站服務就需要接受此條款。 詳細隱私條款. 同意